Itsarsuarli kalaallit atortuutimikkut imminnut pilersortuupput, tamaattumik atortutik suliarisarpaat Kalaallit Nunaannut naleqqussartuarlugit. Ukiullu 4000 sinnerlugit Kalaallit Nunaat inoqarsimavoq atortuutimikkullu suliaqartarnerminni pinngortitaq allanngortinnagu inuusimallutik. 

Kalaallit qajartornermik, qimussernermik, umiamillu angalanermikkut, nunamilu inuuniarneq ingerlattarsimavaat, taamatullu aamma imaani nunamilu atortutik Kalaallit Nunaannut naleqqussartuarsimallugit. 

Suliat ilusaasa sananeqarneri tammattaaliortuarnissaat ingerlanneqalerpoq, atortut sananeqarneri aallaavigilluinnarlugit tunisassiorneq ingerlanneqarpoq. 

Ilisarnaat:
Qulleq

Inneq kiassaavoq, qaammarsaavoq, ingaartortitsisarlunilu, allaat ”sannataasarluni”.

Pingaartorsuusimavoq inneq ”killilerneqartalermat” – kalaallini qullermut ukkusissamut. Ukiorparujussuarni qulleq ukkusissaq kalaallit naammagisimavaat – pigisat pingaarnerpaat ataqqinarnerpaallu ilagalugu.

Qullermut ilaapput innanniutit, iparaq, taqqissuut orsorlu.

Qulliit ”oqaqartarput”, orserfimmi qattunersaq, orsoq ikummatissaq suli aanneqanngitsoq taassuma timaatungaaniitinneqartarluni – ”oqummissat”. Oqaqanngitsut orsussaat kaavarsillugilluunniit oriorneqartarput.

Qulliit nalikkaguteqartarput, qisuk saalimasoq pingasunik niululik, taqqissuuteqartarlutillu, tassa palersiniiaat, innerissaat allamullu ikitsissutaasarluni.

Manerisarpaat (iparaq) issuatsiaasat issorluunniit qussissoq panerserluagaq.

Qulliit sillinittarput (qalippertarput) salittariaqalersarlutik. 

Otto Sandgreen  
Atuakkiortoq

Punngarsuut

Punngasuut aalisakkanut aalisaataavoq ukkusissamik sanaaq timmissallu qutuinik akkersaatitalik, taannalu atorneqartarpoq ukiumi sikumi aalisarluni kanajorniutitut.

Sakæus Olsen
Pilersaarusiortoq